Moriyón asegura que Cascos tenía tol poder nun partíu con un "sistema presidencialista"

Álvarez-Cascos: "Nun tenía problemes económicos y taba dedicáu dafechu a Foro"

La presidenta de Foro y alcaldesa de Xixón, Carmen Moriyón, aseguró que dende la fundación del partíu "too pasaba por Francisco Álvarez-Cascos, en tolos órdenes", porque rexíase por un "sistema presidencialista dafechu", y qu’hasta qu’ella nun tomó daveres les riendes en 2019 nun supo que pasaba "gastos totalmente personales, de la mañana a la nueche".

Moriyón, que foi la primera en testificar nel xuiciu que se sigue na Audiencia d’Uviéu escontra l’ex-líder de Foro y ex-presidente del Principáu por un presuntu delitu de contino d’apropiación indebida, aseguró tamién qu’hasta que nun pidió les cuentes bancaries nun supo que se taba pagando por una sede del partíu en Madrid, que naide nun conocía y que tampoco yera necesaria.

L’alcaldesa de Xixón, Carmen Moriyón, asumió la presidencia del partíu en 2018 y, dempués d’algamar dos diputaos nes elecciones autonómiques de 2019, afitóse como prioridá poner al día les cuentes del partíu, polo qu’encargó una auditoría que derivó na querella presentada por Foro escontra’l so ex-líder.